Prestar cada vez máis servizos ós asociados é un obxectivo permanente da Asociación de Empresarios Terra de Melide (Asetem-Cca) dende a súa fundación. Pero para facer axeitadamente esta labor, a organización debe coñecer a opinión dos seus integrantes sobre as accións e actividades que desenvolve. Deste xeito, Asetem-Cca inicia unha promoción destinada ós seus socios a través da súa páxina web -www.asetem.com-.
A iniciativa busca consolidar a interacción entre a directiva e o departamento de administración de Asetem-Cca a través do envío de opinións, comentarios ou suxerencias dos comerciantes e empresarios sobre as novas que se colguen no enderezo web. Aquel socio que remita un mínimo de oito participacións ó mes dende o portal será agasallado cun detalle por parte da asociación.
Os comentarios poden remitirse a través do formulario que hai na propia páxina -no menú ‘Contacto’- ou a través da dirección electrónica
info@asetem.com. É moi importante que os participantes deixen o seu nome e o da empresa ou comercio ó que pertencen para que se poida facer un correcto reconto.
Asetem-Cca quere reactivar a web como ferramenta de comunicación cos seus asociados, así como incentivalos a que utilicen cada vez máis as Tecnoloxías das Información e Comunicación (TIC) nos seus negocios. A campaña tamén persegue a consolidación do uso da rede para acadar maior éxito o uso da tarxeta de puntos do comercio, FideliMelide, unha iniciativa estreitamente vinculada ó uso de Internet.
