A Ruta de tapas premia a mestura de tradicións culinarias de Casa Quinzán’, ‘O Sapo Lambón, Adega O Mandil e A Boa Viña tamén son recoñecidos pola clientela

Semella non ter rival no que a elaboración de tapas se refire: Casa Quinzán repite un ano máis no podio e obtén desta volta o premio á mellor tapa da ruta gastronómica polos bares de Melide que cada mes de xuño organiza Asetem-Cca dende hai catro anos.

Os votos dos clientes e o criterio profesional de Manuel Ángel Garea, de Pastelería Trisquel, escolleron o “Mini Criollo Caseiro” de Casa Quinzán como a mellor das 18 propostas presentadas a concurso, convertendo este local da Rúa do Convento no único que obtivo premio en todas e cada unha das edicións da Ruta de tapas celebradas ata agora.

Boa parte do mérito recae en Nicolás Martínez, cociñeiro do restaurante e creador dunha tapa na que intentou “fusionar diferentes tradiciones culinarias”, algo para o que empregou “criollo argentino, berenjena mediterránea y queso gallego”. A isto  engadíuselle rúcula crocante para crear no padal un efecto de contraste coa crema do queixo. É, segundo o seu creador, “una tapa trabajosa, tanto en la elaboración como en el montaje”.

 

O responsable de Casa Quinzán, Mariano Rivas, expresou o seu agradecemento polo premio concedido e referiuse á influencia que teñen iniciativas como a Ruta de tapas na dinamización da hostalería melidá. Como exemplo, destacou que no primeiro día de concurso esgotaron as 180 tapas que tiñan preparadas en pouco máis de dúas horas.

Á marxe da mellor tampa, tamén se repartiron premios noutras tres categorías. Os ganadores foron O Mandil, O Sapo Lambón e A Boa Viña

 

TAPA CON PRODUTOS GALEGOS – O MANDIL

Polbo, chipirón e gamba feitos á grella, con allada e sal. Unha combinación atinada e unha correcta elaboración valéronlle á adega O Mandil o premio á mellor tapa con produtos   galegos, neste caso obtidos todos eles do mar. É o terceiro galardón que recibe este establecemento rexentado por Jesús Segade, quen comenta sobre a tapa que “parece sinxela pero dá traballo porque hai que facela no momento e tense que servir quente”.

Asegura que o seu espeto mariñeiro “gustou moito” e considera “importante” recibir  un premio por segundo ano consecutivo. Ao seu xuízo unha boa tapa debe reunir dous requisitos fundamentais; ter bos produtos e estar ben cociñada: “Se tes boa materia prima e non a sabes cociñar, non vale de nada. Se cociñas moi ben e os produtos son  malos, estás na mesma”.

 

TAPA INNOVADORA – O SAPO LAMBÓN

A Tosta Lambona elaborada polo Sapo Lambón é unha tapa aparentemente sinxela que agocha un universo de sabores. Creada sobre unha base de pan tostado, está composta por un revolto de pementos do piquillo e gulas salteadas con allo, uns ingredientes que van acompañados por unha redución de vinagre de Módena con azucre.

A súa creadora, Sonia Valiño, explica que intentou facer un prato “práctico, económico e saboroso” e considera que o éxito da tapa radica no contraste entre “o acedo e o doce, o frío e o quente”. Sonia Valiño amosouse “moi contenta” por acadar o premio á proposta máis innovadora: “sempre fago as tapas con moita ilusión, nos catro anos que se leva celebrando a ruta, pero levar o premio é unha ilusión engadida e este ano por fin caeu”.

 

TAPA TRADICIONAL – A BOA VIÑA / A BOA VIDA

O seu nome, Tapa típica galega, xa adiantaba que ía a por todas na categoría de tapa    tradicional. E conseguiuno. A proposta presentada por Alberto Buján e servida no seu establecemento da zona dos viños, fixo que A Boa Viña conseguise por primeira vez un premio na ruta de tapas. “Para o ano intentaremos mellorar”, explica Alberto, quen sinala que o único segredo da súa proposta, elaborada con orella de porco e chouriciños, está en que a carne “é da aldea, caseira e de máxima calidade”. Na súa opinión o que máis valora o consumidor é o bo sabor e o bo produto, por iso para el a presentación é un aspecto secundario ao que non lle dá especial importancia. Segundo explica, un dos aspectos positivos da súa proposta é que   “invita a repetir” tanto a tapa como a consumición.
TAPEAR EN MELIDE TEN PREMIO

Os clientes que participaron na IV Ruta de Tapas entraron no sorteo de atractivos premios. Víctor Estraviz, de As Barreiras (Melide), foi o gañador dunha noite para dúas persoas con     cea e almorzo incluídos no Pazo de Eidián (Agolada), onde poderá gozar tamén de todos os servizos deste complexo hoteleiro rural. Outra veciña de Melide, Eva Camba, resultou agraciada cunha cesta de produtos ibéricos cedida por Distribucións O Carrizo. Os propietarios do bar Novo Valente foron agasallados cunha xornada no balneario Río Pambre.