Sonia Valiño Vázquez, elixida presidenta de Asetem por maioría absoluta’, ‘A participación ascendeu a un 94%, a máis alta na historia da asociación
Sonia Valiño Vázquez resultou elixida como presidenta da Asociación de Empresarios Terra de Melide – Centro Comercial Aberto (Asetem-Cca) por maioría absoluta. Valiño, que ata o momento ocupaba o cargo de presidenta en funcións, obtivo 63 apoios fronte ós 46 que acadou o outro candidato, Diego Sánchez González.
A lista que encabeza Sonia Valiño está constituída ademais por Jose Ramón Villamor Varela, José Valiño Vázquez, Avelino Laya López, Manuel Vázquez García, Manuel Buján Rodríguez, Elena Quintas Silva, Roberto Vázquez Casal, José Luis Carrillo Iglesias, Juan Carlos Casal Vázquez, Rodrigo Fernández Pombo e Javier López López.
A participación na convocatoria electoral foi dun 94%, a máis alta na historia das eleccións celebradas na asociación, algo que o secretario de Asetem, José Ramón Villamor, agradeceu expresamente ós asociados. Exerceron o seu dereito ó voto 111 dos 118 membros da patronal melidense, tal e como contabilizou a mesa electoral, formada polo secretario e dous socios escollidos ó azar. Case un 46% dos socios optou por delegar o seu voto (51 votos delegados). Unicamente se consideraron como nulos dous votos. O proceso de votación transcorreu sen incidentes ante a expectación da práctica totalidade dos membros da asociación.
