O Grupo de Desenvolvemento Rural Ulla Tambre Mandeo organiza para os vindeiros días 28 e 29 de novembro un curso práctico de escaparatismo e deseño de stands dirixido a produtores locais e comerciantes de proximidade. Será no Telecentro Melisanto, en Melide, de 16:00 a 20:00 horas.

Esta acción encádrase dentro das actividades complementarias que se están a poñer en marcha en relación á III Feira de Agasallos Locais, que se celebrará na vila melidá o 13 e 14 de decembro.

O obxectivo desta actividade é que os asistentes lle saquen o máximo partido ó seu produto formándose no ámbito da presentación e decoración dos espazos nos que o expoñan, xa sexa o propio negocio ou nos eventos ós que acudan; feiras, festas e outros eventos.

No curso, ademais de formación e asesoramento, traballarase de forma práctica cos materiais que poñerá á súa disposición o equipo formador para dotarse de elementos funcionais que o alumnado poida utilizar en eventos futuros.

Para inscribirse abonda con contactar co GDR Ulla Tambre Mandeo a través do seu correo electrónico (utm23gdr@yahoo.es) ou teléfono (981 511 377).